Da’n nchhen kí shlho’en yogo da’ beseka’ Inkisisionna’, kate’ ba gwde zan shi koenwejé iz ba bnit Tenochtitlánna’. Loe’ yish ki nyoj bika dan gosebanhe’, dan nben kí chhoe’ten dilla’ bixchen beselleb bene’ la koronan ka nhak yelamban che nha’ ka’ sosa’ lhalle’ benexhon ka’, nha’ lez chho’en dilla’ gosedabaga’ bene’ nahuas ka’ le gake’ bosotile’ le’. Katen ba bnit yell Tenochtitlánna’, to bene’ golle’ Miguel Tlaylotlac nha’ yecho-shone bene’ yell bosokoashe’ yej gwlhas ka’ sjalle’ lo’ yodao che Huitzilopochtli, nha’ gosego’ shawen shtit, gokse besellelhe benextilh gwnhabia’ ka’ len. Martín Ocelotl, to bene’ sinha’ walh chsed lni blhao che nahuas ka’, lez gwdap shie’ shtit da’ walhen sjanhap mexicas ka’, gag gok ssha kate’ bosochello’ benextilhen le’, kon bosodéde’ chhesie’ le’ da’ xhian chhonho, nha’ beseyke’ yogo dan bkoashe’.